Bangungot ni Marky Cielo, Pinagdudahan

NGAYONG hindi pa lumalabas ang official na statement tungkol sa pagkamatay ni Marky Cielo, iba’t-ibang ispekulasyon at pagdududa ang nagla­labasan.

Hindi na lang namin isusulat ang iba’t ibang pagdududa na naririnig namin mula sa iba’t ibang tao, bilang respeto na rin sa naiwan niyang pamilya.

At sa totoo lang, mahirap magbigay ng komento sa mga ganitong sitwasyon. Pero, base sa pagkakakilala ng showbiz kay Marky, maituturing na isa siya sa may pinakamalinis na imahe sa showbiz.

Ni minsan ay hindi naiugnay ang pangalan niya sa droga, sigarilyo, o alak.

Hindi rin siya mahilig gumimik, hindi mahilig sa basag-ulo, at madalas ay nasa bahay lang siya.

Hindi rin nakitaan ng pagbabago si Marky kahit nung nanalo na siya sa Starstruck ng GMA 7. At kahit dumami ang shows niya sa Siyete noon, hindi pa rin nabahiran ng mantsa ang image ni Marky.

Sa totoo lang, tahimik ang buhay ni Marky sa loob at labas ng showbiz.

Nung ma-interview namin kamakailan si Marky sa presscon ng LaLola, sinabi niya na hindi siya nagmamadaling sumikat. Gusto raw niya ay hinay-hinay lang, pero de­sidido siyang magtagal sa showbiz.

Mabait na kapatid din si Marky, dahil nung nasa showbiz na siya, tumulong siya sa pag-aaral ng kanyang nakababatang kapatid.

Nalulungkot lang ako na hindi masyadong napag-usapan ang pagkamatay ni Marky noong Sunday, dahil nakasabay `yon ng panalo ni Manny Pacquiao sa laban nila ni Oscar dela Hoya.

Halos gabi na nung Sunday nung malaman ng maraming tao na patay na si Marky. May isang kaibigan nga kami na kahapon lang nag-text sa akin, at nagsabi na nalulungkot siya sa pagkamatay ni Marky. Ibinoto raw niya ang binata noong lumaban ito sa Starstruck.

Sa totoo lang, madaling mahalin si Marky, dahil bukod sa pagiging magalang nito, hindi niya ikinahihiya ang kanyang pinagmulan.

Noon pa man, proud na proud si Marky sa pagkakaroon niya ng lahing Igorot.

Hiling lang namin, tumigil na sana ang ibang tao sa pagpapakalat ng tsismis tungkol sa pagkamatay ni Marky. Mas maganda kung ipagdasal na lang natin ang katahimikan ng kanyang kaluluwa.

~REY PUMALOY