Marky Cielo, Problemado Bago Namatay

NAKAKAAWA ang ina ni Marky Cielo na si Mildred Cadaweng nang nakausap namin sa burol ng kanyang anak kahapon nang umaga. Nakaharap siya sa kabaong ni Marky at sinabi niya sa amin na sana, taping lang iyung pagkahiga ng kanyang anak sa kabaong.

“Ilang beses na rin siyang humiga sa kabaong. eh. Pero pagkatapos ng taping, tapos na iyun. Ito ngayon, hindi na ta­ping. Totoo na ito. Hindi na siya artista dito,” pahayag ng ina ni Marky,
Malalim na palaisipan pa rin sa amin ang sanhi ng pagkamatay ni Marky.

Sa pakiusap ng ilang taong malapit sa kanya, hindi na namin inurirat kung paano siya namatay. Kahapon nang umaga ay dumating ang mga pulis para mag-imbestiga. Inaabangan pa ang official statement mula sa kanyang pamilya at sa GMA Artists Center.

Nu’ng Sabado nang umaga ay nag-shoot si Marky ng ‘Struckatak’ segment ng Startalk. Pagkatapos nu’n ay meron lang daw itong dina­anan na isang commitment at tumuloy sa Station 168 (Morato Av., QC) para maglaro sa computer. Nagkita pa raw sila roon ni Mike Tan at sanda­ling nagkausap.

Pasado 11:00 PM na raw ito nakauwi. Pagdating ng bahay ay seryosong nagkausap daw silang mag-ina. Ayon kay Mrs. Cadaweng, may dinadalang problema si Marky pero maayos daw silang nag-uusap.

Wala raw pagkakaiba iyun sa mga pag-uusap nila noon. “Minsan, tinatabihan ko siya, o kaya siya ang tumatabi sa akin at nag-uusap kami. Ang pag-uusap namin nu’n, parang tsina-challenge ko siya na harapin niya kung ano ang implications ng na­ging desisyon niya,” pahayag ni Mrs. Cadaweng.

Kahit masakit, unti-unting tinatanggap ng ina ni Marky ang nangyari sa kanyang anak. “Siguro hanggang du’n na lang talaga ang binibigay sa kanya ng ating Pa­nginoon. Siguro, natapos na rin niya ang misyon niya sa ating lahat at sa amin,” pa­tuloy ng ina ng yumaong young actor.

Nasilip namin ang FaceBook (internet website) ni Marky at palaisipan uli sa amin ang mga mensaheng inilagay nito. Nu’ng nakaraang buwan ay nag-log daw ito ng “Oleic (baligtad ng Cielo) says, life is… parang bato…it’s hard.”

Nu’ng December 1 siya huling nagpadala ng mensaheng, “Oleic is going cold turkey.”
Ano kaya ang ibig sabihin ng mga ipina­dala niyang mensahe?

Nu’ng Linggo nang madaling araw ay tumawag pa raw ito kay Tess Bomb pero wala raw pagkakaiba ‘yun sa mga pinag-usapan nila noon.

Nagkakumustahan lang daw sila kaya sobrang nagulat si Tess Bomb nang nabalitaan niya ang nangyari kay Marky nu’ng Linggo nang umaga.

Pati ang manager niyang si Rommel Gacho ay tinatawagan din ni Marky at tini-text pero hindi ito nasagot ni Rommel dahil maaga itong nakatulog.

Ang mga nakasabayan niya sa Starstruck ay sobrang nasaktan sa nangyari kay Marky.
Habang inaayos pa ang labi ni Marky sa St. Peter’s Chapel sa Antipolo, nagdagsaan na roon ang mga kaibigang artista ng young actor.

Ihinatid ang labi ni Marky sa kanyang bahay (Lot 8 Block 13 Sta. Isabel, Mission Hills, Antipolo, one kilometer away from Shopwise) nu’ng Lunes nang madaling araw, at hindi na nila napigilang mag-iyakan.

Pati sa taping ng Lalola kahapon ay nag-iiyakan sila dahil mahirap pa rin sa kanilang tanggapin na hindi na nila ito makakasama sa trabaho.

Sabi pa ng ina ni Marky, ang pagkakaalam niya ay tahimik lang ang kanyang anak at hindi palakaibigan, pero sa nakita niyang mga nakiramay at sobrang apektado sa pagkawala ni Marky, doon niya nakitang marami ang nagmamahal sa kanyang anak.

Noong Hunyo lang daw sila lumipat sa bahay na iyun sa Antipolo at hindi pa raw alam ni Mrs. Cadaweng kung ano ang plano nila.Mamaya ang huling gabi ng lamay kay Marky sa Antipolo.
Bukas (Miyerkules) nang umaga ay dadalhin na ang labi ni Marky sa Mt. Province at doon ito ililibing.

~Abu Tilamzik